Senieji patarimai ūkininkams

2018-05-04 / Žemaitijos NP

Pavasaris eina laukais. Prasidėjo žemės darbai. Seniau žmonės stebėjo aplinką, tikėjo mėnulio, kitų dangaus kūnų įtaka. Pateikiame J. Mickevičiaus rankraščio medžiagą ir  1995 m. kraštotyros ekspedicijoje D. Astramskaitės ir V. Vaitkevičiaus surinktą informaciją apie kai kuriuos pavasario darbus, saugomą ŽNPD archyve.

Bolvės rēk sietė gegožės paraižuos (mėnuliui dylant); jaunamė mienesie ēt i kodlas, galė maž mezg.

***

Bolvės rēk sietė vakarėnio ėr rītėnio viejo: debesoutuo, ukanoutuo; pėitu ėr šiaurės viejo – kėrmie, vo šiaurės viejo da ėr mažas tier.

***

Kopūstus dėigtė pėlnėjuo ėr puo paraižū – gerā īr, vo rasuodna sietė i jauna mienesi, tik rēk veizietė ka mienou nebūtu matuoms.

***

Bolvės vaguotė rēk, ka mienou īr grīžės trėtė dėina – bolvės īr mėltingas.

***

Cėbolės siekla rēk padietė  ont dounas imaišīma po paraižū, vo ka neparīžės mienou – žīd kāp pastėposės.

***

Žėrnius rēk sietė jaunamė mienesie, šiaurės viejo ėr nedebesouta dėina.

***

Rogē sietė pėlnėjuo, paraižuos gerā īr, vo kėtumet – ne.

***

Pėrmėje glousne, alksne lapus sklēd: siek pėrmuojė siekla; vo ožouls spruogst: paskotėniūsius siemenis siek ėr sietovė pakabink.

***

Pasiek avėžas jaunamė mienesie – nebūs geras: šiauds īr minkšts, sorezgės, išsėdraikės.

***

Mienou īr matuoms siejont mėižius ėr kvėičius – išēt i pėišas.

1929 m. lėipas 20 d. papasakuojė 70 m. omžiaus Verketienė iš Plungės miesta, užrašė Mickevičios Jūzaps.

***

Jaunamė mienesie bolvės sietė negerā, vaguotė bolvės geriausē pėlnėjuo, paskotėni mienesė pėnktadėini.

Ka Mienulis ė Saulė dongou – daržū dėigtė nareikietom.

Ka darža dėigi, je dongou daug debesū, gali lauktė gera derliaus.

Sietė par Krīžauninkės dėinas negal.

Papasakoujė Balsītė-Gasauskienė Alduona, g. 1921 m., gīvena Paežerės Rūdaitiūs, užrašyta 1995 m. kraštuotīras ekspedicėjės metu.

***

Ka pradedi sietė, pėrma grūdū saujė rēk mestė i šiaurė – tumet grūdā būs stėprė.

Je padiesi vėšta perietė atsokta i šiaurės vieji, vėsė vėštītē būs plievė aptrauktė, vuo je i vakarini vieji atsokta, vėštītē ėšrėities sveikė.

Pėitū vies kirminis, tumet bolviu sietė nagal.

Ka īr tarpiejis (toštoma), gers laiks sietė, pjautė.

Geriausē daržus dėigtė prīš pėlnėje.

Markas sietė rēk i jauna mienesi.

Papasakoujė Jakumienė Zenuona, g. 1931 m., ėr Jakoms Al’puonsos, g. 1924 m., gīvena Paukštakiu apīl. Muolopė kaimė, užrašyta 1995 m. kraštuotīras  ekspedicėjės metu

***

Bulviu nagal sietė par Krīžauninkės dėinas.

Bolvės geriausē sietė par pėlnėjė.

Geriausē bolvės sietė i rītū posė, nes je pasiesi i pėitū posė, bolvės kirmies.

Papasakuojė Šimkienė Valerėjė, g. 1923 m. ėr  Šimkos Zenuons, g. 1922 m., gīven Paukštakiu apīl. Lazdiniu kaimė, užrašyta 1995 m. kraštuotīras  ekspedicėjės metu.

 

Scroll to top