Juonėnės

Švėntė rėktous polkluora ansamblē: „Alksna“ ėr ,,Alksniuka” ėš Mažeikiu,  ,,Cīrulelis” ėš Gargždu, „Platelē“ ėš Plateliu.

Pruograma

20⁰⁰ –   švėntės pradė: ejėms pro vartus, apsėprausėms;

20³⁰ –   kupuoliavėms, ēnont par devīnis laukus, vainėku pīnėms;

21¹⁰ –   būrėmā so kupuoliem, lingavėmuos,;

21⁵⁰ – mediu lonkīms

22⁰⁰ –   saulės palīdiejėms;

22²⁰ – aukora, stebolės  ė lauža oždegėms;

22⁴⁰ – vainėku mietīms;

24⁰⁰ –   papartė žėida ėiškuojėms; šuokėniejėms par lauža;

0¹⁰ –     Juoniu ė Janinu sveikėnėms;

0²⁰ –     vainėkieliu plokdīms;

1⁰⁰ –     linksmībės;

4⁴² –     prausėmuos rasuo, tekontiuos saulės sotėkėms.

Platelē, 2013

Tikiejėmā, bortā

***

Juona nakti rēk ētė i mėška, ka ni šonėis, ni gaidė balsa nebgaliesi gėrdietė, tumet i tonkumīnus ētė, kor papartē aug. Saka, ton nakti papartis žīd, vo ont kuo tas žėids nokrint, tas vėskon žėnuotė praded (Žemaitėjė).

***

Jē par Kaliedas sning – par Juona līn (Plungė).

***

Jē par Juonėnės līn, tās metās karvės daug pėina dous (Kaltiniena).

***

Laumės, saule nosėlēdus skalbas. Drabužius džiovėn švėitont mienesiou. Tėn pat, švėitont mienesiou, ont kalna pasėdiejosės vėsa torta, piningus skaita (Vėikšnē).

***

Ka laumės pėina neatimtu , rēk pri kūtės doru ėš lauka posės ont vėršotėnės staktas prikaltė maža šermokšnėni krīžieli (Vėikšnē).

***

Ka pėins pagend arba pasėdara skīsts, rēk ėrėštė karvē i oudėga vobolioka.

***

Ka laumė apsied karvės, rēk švėnta Juona nakti anas ėšvarītė i laukus ėr anuoms ėš paskuos valkiotė uzdeni (Seduos apl.).

***

Juonėniu nakti dvėm muotrėškuom nu svetėmuos pėivas šniūru rēk brauktė rasa. Ton šniūra nukratītė ont sava pėivas – dėdelē augs žuolie (Alsiedē).